عيدي هالســنهـ غير

الســلامـ عليكم

شلونكم شخبارك

عيدكم مبـارك << ايت متأخر بس ماعليه

هالسنه فعلا كان عيدي غير

مو مميز ولا هم يحزنون

بس هالعيد كان بدايته دمعه

الســبب يمكن تستغربون منه

عندي يـد ابوي ( بابا عود ) الله يرحمه ان شاء الله

متوفي من قبل 11 سنه

اي 11 سنه

توفى 14 / 5 / 1998

وقتها كان عمري 8 سنين وجم شهر

كنت ياهل

يعني حياتي معاه بس بالطفوله

المهم امي وابوي الله يخليهم فديتهم

متعودين كل عيد يروحون المقبره

ولما كنت ياهل كنت اروح معاهم كل مره بس بعدين لا

لان كله كنت اكون نايمه لان اهم يروحون المقبره مبجر

عاد اولت امس بابا قال حق ماماتي باجر الساعه 6 ونص بنروح المقبره

طبعا انا استانست وع طول قلت بيي وبعدين عقب نص ساعه تقريبا قلت لا ماني يايه اكيد راح اكون نايمه

وبعدين قاعده اقول انا ما احب العيد و هالشي اول مره اقوله وكنت مستغربه ليش ماحب العيد بالعكس يمعه اهل

قبل لا انام باباعود الله يرحمه ايا ابالي

انصدمت من روحي معقوله 11 سنه ماكان ايي ابالي

او حتى لما كنت اتذكره كنت عادي يمكن بس كنت اتضايق بس هالمره لا اكثر من ساعه ونص ابجي ابيه

وقعدت اتذكر

مرت علي صاله بيت يدي و شلون كان العزا

و بأذني سمعت صوت امي لما سمعت الخبر شلون كانت نبره صوتها

تذكرت شلون كنت قاعده تحت الدري وابجي ان بابا عود بس راح

الله يرحمه كان كل مايلعبني انا كنت انحاش منه كنت اخاف منه

اي كنت اخاف

يمكن اخر جم سنه من وفاته اللي بس كنت اقرب صوبه

وبعدين يوم كان يبوسني كنت اقوله انت تقززني من سبه لحيته

بس بعدين لا كنت اروح عادي عنده

الله يرحمه كان يبي يسميني "ضحى " وانا 19 سنه واقول اشوه ماسموني ضحى اسمي احلى من اسم ضحى الحمدلله اسمي مو ضحى اللحين تحسفت حسافه اسمي مو ضحى

ابيه اللحين بس ابي ابوسه ابي احضنه

تفاصيل سنوات كان عايشها مرت علي امس

تذكرت مكان قعدته وشلون قعدته

تذكرت يوم دقو علينا بليل وقالو ان اهوا بالمستشفى وكلنا طلعنا ركض بنوصل بسرعه المستشفى المستشفى

مرت علي اللحظه بمستشفى الشركه وشلون امي و عماتي و اعمامي كل واحد شلون واقف واللي شلون قاعد

ليلحين اتذكر واحد واحد دش عليه

بس انا ماخلوني

يا اني لاني كنت ياهل يا لان خافو اني اشوفه

تذكرت اني كنت العب واتعبث بالاغراض لما رن التلفون وكانت عمتي تكلم امي وكان صوت امي هالمره غير اتذكر نزلت و قعدت ع الدري و شفت امي تبجي و ادور ابوي ودريت ان باباعود توفى

باباعودي متحسفه ع كل ثانيه قلت فيها اشوه اسمي مو ضحى

متحسفه ع كل مره كنت تبي تلعبني وانا انحاش

متحسفه ع كل مره قلت لحيتك تقزز

باباعودي احبك

مشتاقه اشوفك قاعد بمكانك

ودي ادش باجر بيت يدي و اشوفك قاعد مكانك

او ادش غرفتك واشوفك تقرى قرآن وتأشر اقعد يمك و تمسكني و تقرى قرآن وتخليني اقرى معاك

مشتااقتلك ابي لما يبوسونك وتبقع الحمره ع راسك تبي تمسحها اقوله لا باباعود انا و امسحها وبعدين ابوسك تقولي ليش ادمريني اقولك لا باباعود انا مو حاطه حمره

ابي يقولون لي روحي يبي عصايه بابا عود بس هالمره ابي انا اكون انا عكازتك مو العصاية

ابي اشوفك لو ثانيه

11 سنه كنت فاقدتك بس مو كثر اليوم بالذات

باباعودي وينك مافي احد اللحين ناخذ المكبر ماله وبعدين عمتي تزفنا تقول لا تكسرونه مال بابا عود وانت تقول لا اهم بيقرون ويردونه

واحنا كنا نسمع كلامك ونرده

باباعود المكبر ليلحينه موجود عند ابوي وحتى قرآنك موجود

بس انت وينك

صج كنت اتذكرك و اقرالك الفاتحه و سوره يــس و اختملك القرآن بس انت وينك

باباعودي انت رحت بس تفاصيلك قاعده تمر اللحين جدامي

وين من قبل 11 سنه كنت ناسيتك لا استحاله انت بقلبي

بس بشنو كنت لاهيه عن ذكراك

باباعودي والله قاعده احاتي باجر شلون بمر عند غرفتك ولا حتى شلون بشوف مكانك بالصاله

الصاله تغيرت و كبرت و وسعت بس مكانك موجود

كنت تحبنى و تستانس لما تشوفنا

كنت تلعبنا وماتحب تشوف احد يزفنا

الله يرحمك يالغالي

ليت الزمن يرجع و اقدر اعيش معاك لو يوم

الله يرحمك ان شاء الله ويغمد روحك الجنه

عيدي غير فعلا اضحك وبداخلي غصه

وينك باباعود

و ويني انا 11 سنه

الله يرحمك ويرحم جميع اموات المسلمين